25 Sentyabr 2017 Bazar ertəsi

Faydalı tərəvəzlərdən biri: kələm


Ölkəmizdə becərilən və geniş istifadə edilən bitkilərdən biri də kələmdir. Kələmin bir çox növü mövcuddur

2016-01-25 14:54

Faydalı tərəvəzlərdən biri: kələm

Ölkəmizdə becərilən və geniş istifadə edilən bitkilərdən biri də kələmdir. Kələmin bir çox növü mövcuddur. Yəqin ki, ən çox istifadə etdiyimiz növü də ağ kələmdir. Həm gözəlləşməyimizə, həm də sağlam orqanizmə sahib olmağımıza səbəb olan kələm ən yaxşı vasitələrdən biridir.

Kələm C vitamini ilə xüsusilə zəngindir. Bu vitaminin miqdarı kələmdə sitrus meyvələrində olandan daha çoxdur. C vitamini immun sisteminə müsbət təsir edir, damarların divarlarını bərkidir, iştahı artırır. C vitamini, həmçinin təbii antioksidantdır. O, orqanizmdə gedən qocalma prosesləri ilə mübarizə aparır. Kələm qan azlığı olanlara və astma xəstələrinə xeyirlidir. Öskürəyi kəsir, bəlğəmi azaldır.

Bundan əlavə, kələmdə nadir U vitamini də var. Bu möcüzəli vitamin selikli qişalarda olan zədələnmələri bərpa edir. Məhz bu səbəbdən kələm və kələm şirəsi mədə və 12 barmaq bağırsağı xorası və eroziyaları olan insanlar üçün çox xeyirlidir. Kələm şirəsi qaraciyərə, həmçinin hepatitlərin bütün tiplərində müsbət təsir göstərir.

Kələm K, PP, B qrupu vitaminlər və kalsium, kalium, dəmir, sink, fosfor, kükürd, dəmir, mis, maqnezium və yod  kimi minerallarla zəngindir. Yod beyinin və qalxanavari vəzin normal fəaliyyəti üçün olduqca vacibdir. Kələmin tərkibində xərçəng hüceyrələrinin çoxalmasını əngəlləyən kimyəvi maddə var.

Təzə kələm qəbizliklə mübarizədə ən yaxşı və sınanmış vasitələrdən biridir. Kələm bağırsaqları təmizləyir, onların fəaliyyətini yaxşılaşdırır və stimullaşdırır. Kələm orqanizmi toksinlər və digər ziyanlı maddələrdən təmizləyir, arıqlamağa kömək edir. Kələm kosmetologiyada da geniş istifadə olunur. Kələm üz dərisinə çox müsbət təsir edir - dərini cavanlaşdırır, ağardır, daha elastik edir. 

Kələmin bu qədər faydalarına baxmayaraq, çox ucuz tərəvəzdir. Bu bitkini, demək olar ki, hər mövsüm tapmaq mümkündür. Qədim dövrlərdə olduğu kimi, bu bitki tibb sahəsində də istifadə edilir. İnkişaf dövründə olan uşaqların və gənclərin bundan istifadə etməsində çox fayda vardır. Həm çiy, həm də bişmiş olaraq yemək mümkündür.

Bir məqama da diqqət çəkmək istəyirik: bizim üçün vitamin və minerallarla dolu olan bu tərəvəz bitkisini kim yaradıb, heç düşünmüsünüzmü? Yuxarıda kələmin faydalarının elmə məlum olan bəzi hissələrini sadaladıq. Bəlkə də, bir çoxumuz bu faydalardan xəbərsiz idik. Uca Allah bir tərəvəzi bu qədər bol vitamin və minerallarla bizim üçün yaradıb. Allah əsrlərdir ki, kələm də daxil olmaqla bir çox bitkini xidmətimizə vermişdir.


(O mərhəmətli) Allah ki, göyləri və yeri yaratdı, göydən su endirib onunla sizin üçün (növbənöv) məhsullardan ruzi yetişdirdi... (İbrahim surəsi, 32)

 


 

Xəbər lenti

Bütün xəbərlər