Azərbaycanla Bolqarıstan viza rejiminin sadələşdirilməsini müzakirə edir


Azərbaycan Sahibkarlar Konfederasiyasının prezidenti Məmməd Musayev Bolqarıstanın Azərbaycandakı səfirliyinin birinci katibi Yanko Yanakiyev, ..

20 Aprel 2018 11:45

Azərbaycanla Bolqarıstan viza rejiminin sadələşdirilməsini müzakirə edir

Azərbaycan Sahibkarlar Konfederasiyasının prezidenti Məmməd Musayev Bolqarıstanın Azərbaycandakı səfirliyinin birinci katibi Yanko Yanakiyev, Bolqarıstanın Bakıdakı ticarət missiyasının rəhbəri İliyan Kostovla görüşüb.

Azərbaycan Sahibkarlar Konfederasiyasından  verilən məlumata görə, Bolqarıstanın Azərbaycan üçün dost ölkə olduğunu deyən M. Musayev bildirib ki, iki ölkənin dövlət başçıları arasında olan yaxşı münasibətlər iqtisadi əlaqələrimizin daha da genişləndirilməsinə zəmin yaradır. Qeyd olunub ki, Bakı ilə Sofiya arasında birbaşa aviareysin açılması hər iki istiqamətdə turizmin inkişafı ilə yanaşı iki ölkənin iş adamlarının sıx əməkdaşlığı üçün də şərait yaradacaq.

Azərbaycanda Bolqarıstanın  ticarət missiyasının rəhbəri kimi yeni təyin olduğunu deyən İ. Kostov ASK ilə sıx əlaqələrin qurulmasında və biznes icmalara dair məlumatların mübadilə edilməsində  maraqlı olduğunu bildirib: “Qeyd etdiyiniz kimi doğurdan da ölkələrimiz arasında çox gözəl dostluq münasibətləri mövcuddur. Lakin bu münasibətlər indiki ticarət  dövriyyəsinin həcminə uyğun gəlmir. Bolqarıstan şirkətlərinin Azərbaycana marağı böyükdür. Azərbaycandakı gənc  nəsil bizim nəslin nümayəndələrindən fərqli olaraq Bolqarıstan məhsulları haqqında yaxşı məlumatlı deyil. Bu baxımdan Bakıda Bolqarıstan məhsullarının satıldığı mağazaların və ticarət evinin açılması yaxşı ideyadır”.

M. Musayev Bolqarıstan şirkətlərini Azərbaycanın nəqliyyat-logistika imkanlarından istifadə etməklə məhsullarını Orta Asiya və qonşu ölkələrin bazarlarına çıxarmağı təklif edib. M.Musayev Azərbaycan Sahibkarlar Konfederasiyasının Bolqarıstanla ticarət əlaqələrinin inkişafı və iki ölkənin iş adamları arasında münasibətlərin qurulması istiqamətində hər an dəstək göstərməyə hazır olduğunu bildirib.

Bolqarıstanın Azərbaycandakı səfirliyinin birinci katibi Yanko Yanakiyev əlavə edib ki, hazırda  Azərbaycanla Bolqarıstan arasında viza rejiminin sadələşdirilməsi müzakirə edilir. “Bizim Asan viza ilə bağlı çox yaxşı təklifimiz var. Hazırda bu məsələ Xarici İşlər Nazirlikləri səviyyəsində müzakirə olunur. Biz vizanı ASAN vasitəsi ilə sadələşdirə bilərik. Lakin hansı qərarın veriləcəyini zaman göstərəcək”, - deyə Y.Yanakiyev bildirib.

Ensonxeber.az


 

Xəbər lenti

Bütün xəbərlər